Hos 11 | HilAPD | STEP | Nagsiling ang Ginoo , “Sang pareho pa ang Israel sa isa ka bata, ginhigugma ko siya. Gintawag ko siya halin sa Egypt bilang akon anak.

Hosea 11

Ang Gugma sang Dios para sa Israel

1 Nagsiling ang Ginoo, “Sang pareho pa ang Israel sa isa ka bata, ^{▼▼Sang pareho…bata: sa literal, Sang bata pa ang Israel. Ini ang panahon nga ara ang mga Israelinhon sa Egypt ukon sa kamingawan.} ginhigugma ko siya. Gintawag ko siya halin sa Egypt bilang akon anak. ^{▼▼Gintawag…anak: ukon, Gintawag ko ang akon anak halin sa Egypt.} 2 Pero karon, bisan sige ang tawag ko ^{▼▼ko: Amo ini sa iban nga mga kopya sang Septuagint. Sa Hebreo, nila.} sa ila nga mga taga-Israel, labi na gid gani nga nagapalayo sila sa akon. ^{▼▼akon: Amo ini sa Septuagint. Sa Hebreo, ila.} Nagahalad sila sang mga halad kag nagasunog sang mga insenso sa mga imahen ni Baal. 3 Ako ang nag-atipan sa ila; daw pareho lang nga gin-uyatan ko sila ^{▼▼sila: sa Hebreo, Efraim. Makita man ang pulong nga Efraim sa Hebreo sa bersikulo 8, 9 kag 12. Tan-awa ang footnote sa 4:17.} sa kamot kag gintudluan sa paglakat, pero wala nila ginkilala nga ako ang nag-atipan ^{▼▼nag-atipan: sa literal, nag-ayo} sa ila. 4 Gintuytuyan ko sila nga may pagpalangga pareho sang pagpalangga sang isa ka tawo sa iya nga baka. Daw pareho lang nga ginkuha ko ang gota sa ila liog kag nagduko sa pagpakaon sa ila. 5 Pero tungod nga indi nila gusto nga magbalik sa akon, sigurado nga magabalik sila sa Egypt, kag pagadumalahan sila sang Assyria. 6 Salakayon sang mga kaaway ang ila mga banwa kag gub-on ang mga trangka sang mga puwertahan sini. Gub-on sang ila mga kaaway ang ila mga plano. 7 Sila nga akon katawhan desidido nga magpalayo sa akon. Gani bisan magpanawag pa sila sing tingob sa akon indi ko sila pagluwason. ^{▼▼Indi klaro ang buot silingon sang Hebreo sa sini nga bersikulo.}

8 “Mga taga-Israel, indi ko mahimo nga sikwayon kamo ukon pabay-an na lang. Indi ko mahimo nga laglagon kamo sing bug-os pareho sang ginhimo ko sa mga banwa sang Adma kag Zeboyim. Indi maagwanta sang akon balatyagon nga himuon ini sa inyo. Naluoy gid ako sa inyo. 9 Indi ko na pag-ipakita ang akon puwerte nga kaakig; indi ko na paggub-on ang Israel, kay Dios ako kag indi tawo. Ako ang Balaan nga Dios nga kaupod ninyo, kag indi ako magkadto sa inyo nga akig.

10 “Magasunod kamo sa akon sa tion nga magangurob ako pareho sang leon. Sigurado gid nga magangurob ako, kag magadali-dali ^{▼▼magadali-dali: ukon, magakurog} kamo puli halin sa west. 11 Magaabot kamo sing madasig ^{▼▼sing madasig: ukon, nga nagakurog} pareho sang mga pispis nga halin sa Egypt ukon pareho sang mga pating nga halin sa Assyria. Paestaron ko kamo liwat sa inyo mga balay. Ako, ang Ginoo, ang nagasiling sini.”

Silutan ang Israel kag ang Juda

12 Permi lang ako ginabutigan kag ginatunto sang mga taga-Israel. Ang mga taga-Juda padayon nga nagapalayo sa Dios nga balaan kag matutom. ^{▼▼padayon…matutom: ukon, padayon nga nagasunod kag matutom sa Dios nga balaan.}